tinini sal naithok-kwchang,
khapang swrangwi bwswkse mwchang.
salno naharwi khale tongthokha,
salno naharwi angle khaphurkha.
chumui kubulwi tinini nokha,
kisa watwi,kisa sakolom bai mwchang rwkha.
salni kutung tini kechenkha,
tinini sal teisa kwchangkha.
hayungni maya sago nangphawi,
tinini sal phaikha kwchangwi.
Boroni naithok nwngle manbokha?
ani khano nwng khogwi tlangkha,
kanwi mwchangkha risha-rignai,
bwswkse naithok nwngbai mwchangwi khwnai!
naithogo nwngle o naithokti,
mwchangkha nwng o naithoki.
nono yasi surwi naithok sajago,
nogwi nono khapang mithigo.
naithokti nwng swbaba wngkha?
sikla khano nwng kobor swnamkha.
khumbar bai baksa nini naithokmung,
risha-rignai nini kanmung.
nugwi nono bwkha naithokjago,
bwkhale tini kobor chanaikhado!
O kormoti nini khwnai-
naithoma bara nini rignai,
mwchangma bara nini kanmung,
nwngda wnglang khani sanmung?
khano khogwi khukchwi kwchak,
nwngde wnglang khapangni rangchak?
nini naisikmung kobor khlaio,
nogwi ang nono khapang mwnwio.
kokthai nini jotoni khugo,
nini naisikmung ani khapang swlago.
rignai kanwi tongkha mwchangwi,
swngcharo nwng phaikha naithokno manwi.
Kiphildi nwngle jora tongsini,
muito tongsak kok sasini-
jorale khajak chini bagwi,
tongthai naphaidi nwngle kiphilwi.
boro ba nwngle sariowi thangkha?
tongthaino nwngba khibwi klangkha!
muito khaiwi naisi waisa,
agini tongmung kwrwikha mungsa.
chwng naisingwi tongo non naisingwi,
khao kha-khamo;mokolo moktwi.
chwngbai hakchal nwngle thangtikha,
khukchwi mwnwiming chini kwrwikha.
kha-khamwino chini tongthaio chwng,
boroni hoki chwngno horjwlai mwchwng?
phaidi kiphilwi chini tongthok-chathok,
nono karwi chwng bahaiba tongnai..
Kokni lamo nwngno phayo,
khapang ani nwngle khogo.
tongthai kwmao nono nukyakhe,
khapang swrang nwngbai matongkhe.
wansukmung ani nwngbai kubujak,
khapangle nono bwswkse hamjak!
kobor swnamkha khapangno khogwi,
wansugwi nono ani phaiya mwktrwi.
khwnasai rwkhe nini kwtwi khorang,
khapango ani kwlaiyo pherang.
keslei kwlaikha ani o khapang,
nwngse tabok ani thinangni emang.
khwnai phehalwi ani bwkhanw khawo,
mokolni phataro thangkhe ani khasao.
rwkha ang nono ani khapang phiyogwi,
jorano kiriya tongnai nono naisingwi.
o toksa rwdi nini bwkwrang,
birsai naiyanw nokha kwkhwrang.
hayung kotono birsai naiyanw-
naithok hayungno mokol kaiyanw.
nobarni bising nokha kwcharo,
wanana nangya mungsa khunano.
o toksa ninile kwrwija ari,
birsao nwngle hayungno sari.
nokha gwnangwi nini lama-
bwswkse tongthok nini o langma.
kwrangno phehalwi dolma-dolsa;
thangna muchungo angbo khoroksa.
o toksa ! o toksa!
kwlangdi ano kwrang tangsa.
angbo birsanai hayung naisaowi-
nobar bai baksa angle bataiwi.
twi-narni pungkhirai,
jotobai bole walai-suklai.
chuak bai bole mwkhang suwo,
bihik-bwsano birman riwo.
tangya bole mungsabo samung,
hikni rang natiro phungwi uasung.
pungkhiraini wanama kwrwi-
parani borokno khuktwi musuwoi.
chuakno phegwi tongo lama kwlaiwi,
bihik-bwsakhe kwrwi maichwlwi.
pungkhiraini saktharmung kwrwi-
kwlainai bole sakni hakor khurwi.
walai-suklai bini raidase wngsio,
nwngyakhe chuak bole khasio.
chuakle bini langma sokomkha,
borokni tongmung bini kochomkha.
twinarni Pungkhirai-
bini langmao nangkha horjwlai.
kotogni khutang-
kanwi nwng mwchang.
nono swrwngwi-
kiyogo bwkhrwi.
nini naithokma-
tuwo khao hamjakma
thangwi gatilam-
mwchango lama-lam.
o bwrwima-
nwngle siklan emang.
nini naithokmung-
khapangno kwchang.
khajuni kumbar-
bwswkse naithok!
achuk tontirwi-
twmano wansuk?
o bwrwima-
wngdi ni hamjakma.
thwinagle kwchwng-
wngkhe nwng ani logisong.
naithok bwrwima-
nono rwksaino ani langma
dolma-dolsa tonglaikha baglai
twma Subrai; twma ba mutai?
dophano khagwi swbano rwksa?
kubuino pogwi manbaiwi kwsa.
mutai-burasa chini logio tongo,
Kubuino nugya mokol tongwibo.
sakno dusiya,kwpalno majra berwi;
subrai-mutaino khajai kubuino karwi.
sakmangno pogwi langma kwlwgo,
swbano khajai achugwi tongo!
"chukna ha" tei boro ba khaka!
swngchar naithokno baaikhe pokha?
nwngno mutai,nwngno burasa-
raidano rwgwi sajaknai salsa.
borok wngwi borokno pogwi,
naisai himkha sakno kaslei.
nini kwpalno nwngno swnamnai,
swngcharni raidano tongjadi rwksai.
borokni hamjakmungse kubui hamari,
hayung bai waisa gwdalwi naidi.
kubui borokse mutai-atai,
bono uphilwi mananw khontai.
sakno ta bagbaidi-
sakbaksa wngbaidi.
ta tongdi emangno wanamang,
mwkthangle rwglak jora kwbang.
hayungni mutaino poito chaowi-
mannai nwng bono gana-gini naisaowi.
khano sichaoi-
himwisi naidi.
wngkhe babrai-
bwkhwrwile phainai.
wanama karwi-
himdi bwskang naharwi.
manya ta hwndi-
saktharwi tangdi.
langma swrapsa-
phaiya tewaisa.
langma swnamdi-
pohor mwchwngdi.
twisano yogwi-
kwlangdi uphilwi.
khapangni phaan-
swnamwi kwbang.
nwngle saichungya-
uklog-bwskang naiwi naibaya.
naithok langma-
manai kwbangma.
twlangnai nono-
swraimungni naro.
wansugwi yapri-
lagma saisidi.
nwngle mananw-
langmani yakhili.
kokthaini lamo angle mithigo
mokol mwnago swbale kiphil?
mukumo kubulsai khano methebo
uphilwi angle muito manphiro.
dasa-damara jorabai khibijak,
muito mano hukni muikwthwng-
khorang hachukni khunju nangphaya
jorano naharwi bwswkb khatung!
twinarni para muito manphiro,
kwrwi o jora torokha muito.
komorkha raida tiprasani,
kwlangkha moktwi mokol ario.
lama besero bwswk kesepkha!
chini kwpalo jwngjal nangphawi.
boyar surubwi langma kwchngya,
muito mansaowi moktwi yorsaowi.
sakmang langmano logi rwliya,
khapang thwiruru thango borsaowi
kaslei kwlaio langma kwcharo,
uasung romwibo bidi chaliya.
yorsaowi mokolni moktwi-
Kabo tini nono khatangwi,
muito mano nwngbai tongmarok,
dakti phaisidi "khani-borok".
khapang ani yogo-
moktwi ani yoro,
khatangma rwowi-
tongtikha hachalo.
rutugo nono-
khachukle boro?
yoksao khapang,
maisingni horo.
mukumo nini,
tini muito manmani.
khatangsaowi phaio-
moktwi yorsai klaio.
kwswngjak nini muito,
khao tongo kwbang poito.
khatangma kwbang-
swrangya khapang,
subui bwkrang-
rwphaidi khapang.
twmaswk khatang!
bwkha twmaba wnglang?
chana awk khuya-
chaowi awk pungya.
khapangni jadu,
dakti phaidi_do.
khatangkha nono,
hamjakma nono sano.
bwkha nono naisingo,
khorang ani nono ringo.
Athukiri nwng-
belaino kwchwng,
aswk hachalo,
naisaowi khatango.
Bo Mwnago Angba Sokphaikha?
Sampli Kwmakha!
Mwkthang Kwmakha!!
Bwkhao Ani Sundroma Khorang,
Naisik Nukhroya Ayang-Oyang.
Mwnaksaowi Pohor- Kwmakha Tongkhor.
Langma Nukjaya,Lama Himnani;
Bwskang Naisigwi Biyang Thangnani?
Bo Lamao Ani Yapri?
Wansugwi Tini Bwswkse Kiri!
Phaima Lamao Bahai Uphilnai?
Bahai Mwnago Lam Swlainai?
Sakno Angle Kwmai Rwkha,
Ani Langmano Boro Tubukha!
Mwkthangno Pokha Emangno Nugwi,
Kha-sisakha Aswk Lam Kolok Himwi!
Moktwi Yoro Uphil Naisigwi,
Jora Kwrwikha Aro Sokphawi.
Sakni Birman Ang Ringwi Tubukha,
Kiyokjak Mokolni Emango Ang Kubulkha.
Mwnakni Lamao-
Pohor Khakao;
Langma Rutugwi-
Ang Sokphaikha Boro?
Jorale maising,
khagwi muimasing;
dibor kwchangsoro-
muphunwi awandro;
chathokma bara,
tongthokma jora.
maisingni kosoi,
thaiglak osoi.
gudok-berema bwtwi,
chanano bwswkse kha-twi.
kwlwksa muilok,
bwswkse morok!
khichonwi athuk,
bwswkse gothok.
phuisaowi mulai-
pukhrio sulai,
awandro-chakhwi-
thokma kulkwrwi.
Bahai Sanani?
Kokthaino Ani.
Naisingwi Tongo,
Wansugwi Mogo.
Khani Kokrok,
Sanada Morok?
Kwmaowi Mwkhtang,
Nugo Nini Emang.
Khapang Rutugo,
Khapangni Mokolo.
Langma Kwmao,
Nono Khakao.
Nono Hamjakha,
Rwowi O Bwkha.
Khapang Ringo,
Nono Naisingo.
Kaisa Khakama,
Nini Hamjakma.
Twmano Wansuk!
Langmani Khachuk,
Muito Da Tongno?
Ani O Kokno!
Hamjago Nono,
Thwiyasani Bagwino.
Nwngse Hamjakma,
Nwngno Langma.
Hamjagwi Tongnai,
Baithangni Swmai.
Thwiysakni Hamjakma,
Nonose Khajama.
Tripurani bwsa-
chwngle Tiprasa,
kwrwng-kuthumsa-
tonglawi baksa;
chwng Tiprasa-
chwngle khathansa.
bukung bara-
khapang bugra,
chwng tipra-
buini okra,
hataini mwsa-
tipra bwsa,
Tripura Haa-
chini ama,
chini langma-
Tipura ama.
chwngle bini bwsa-
chwng Tiprasa.
angbo khoroksa-
bumani bwsa,
hamrinai kwsa-
langma tongsa,
tongnai chwngsa-sa;
wnglai khabaksa,
amano mwrwksai,
tangwi swmai.
Bwkhao twmani jala?
o bwkha twmano sankha!
kwrwng kaisa tongna naiya,
bwkhale ani twmani soya?
bwkhani khunju kaihonwi,
khwnaya khorang siringo khwnachomwi,
bwkha swbano naituk,
bophru mannai jaduni haduk?
khorangno pirsai rwsakha khapang,
kubui wngsithung emangni koktang.
bwkha yoksao swbano naisingwi!
toksa wngmate rutukhamo birsaoi.
doglam phiyogwi khapang kiyogjak,
swbano naisingwi khapang ani mogjak?
jorale tini chwngsa-sa
pohor tini khao nangphaikha
gana-gini khapang swrango,
mokolbai-khabai tini jora gothogo.
tongthok-chathok khao kiyogwi,
khukchwi mwnwio tini usigwi.
khapang barsao o hayungo,
siyari kwchang; bwlai kolobo.
sibsaowi rwowi twilwlwk nobar,
motoma bara hengra bubar.
boyar aichukni khano swlago,
seler mechenwi ani o sago.
maising jora sago nangphaikha,
laijak kokrok khao nangphaikha.
siyari kwchang thop thop kwlaio;
aichuk jora khano tungphlariowi.
khapang swrango tini jorabai gothogwi,
o jorano da khapang tongkha naisingwi!
lamsogo tini o jorano,
swrangriowi khapang mihimjakno.
Mokol phiyoktwi khano phiyokdi,
emang sichatwi khano sichadi.
mwkthang baise chini emang,
kwrwngsa wngkhese tornai khorang.
bwswkse tongkha sakno mokholwi!
mwkhthango phaisidi tongmung gwdalwi.
emangno chwng belai swnamkha,
mwkthang chini phonwi kwlaikha.
mwkthang chini emango bai kwlaikha,
thangwi mwktrwi;tini mungsa kwrwikha.
o molo chini swraimung kotor,
horjwlaio chwng manliya kothor.
horjwlai chwngno muphunwi tongkha,
sichadi joto dopha twi kangjakha.
kuthumsa wngnai tinini sarik,
wanaoi nainai chwngno bui nasik.
tini sarik chwng joto triprasa,
borokno phunuknai chini thansa.
sirisitino komorna rwya,
hukumono chwng kebel swnamya.
chini manthaino palkhe sanlainai,
twima wngwi horjwlai mechennai.
thansa wngbaidi joto tiprasa,
chini manthai manai chwng salsa.
salthang jorao chwng joto lamrwnai,
tini sarik jotoni khao khebwi rwnai.
phaidi bayab-phaidi chalai,
o jorao chwng phunuk rwnai.
yapri thansa himwi phunugwi,
dophano rwya chwngle kwlwgwi.
chini phaan kechen tonglak,
dophani chayano chwng tei soiglak.
tinini sarik khorang pirsanai,
hayungno chwng khorang rihornai.
Naithok-nukthok nini thanise,
noka hai kuchuk hukumo chinise.
kanmung nini bwswkse naithok!
mwchango nwngle kanwi kanborok.
hayung bai gwdalwi nini naithokmung,
bwkhano khepbo nini kanmung.
dophle chini nwngbaise mwchango,
tongborok nugwi khapang swrango.
hukumo chini nwng twi-dulkha,
kormoto nono nugwi khapang swrangkha.
chwngsa-sa nini tongmung-chamung,
jotoni khao hukumoni wanama phaithung.
tongthai-chathai ni logi hukumobo tongnai,
buini dopha chini kwthar kokthaino sanai,
o jora bwswkse kebelwi tongkha,
hukumo tini nwngda khati tonikha?
Tongdi nwng ani mwkthang,
kwmai ta thangdi wngwi emang.
nono ang mankhe sakphang,
kubui wngsao ani emang.
nono rwksaowi ani emang,
nini sakphang ani thinang.
nogwi ang nono ani bwskang,
ang ani bwswkse swrang!
tongo ang nono khakamang,
nwngse ani jorano rio mwchang.
ta thangdi nwng himwi bwskang,
nwng kwrwikhe khamsao khapang.
emangni phaiwi wngphaidi mwkthang,
bwkha ani nono rihoro khorang,
athukiri pohorle wngkhana kwchang,
bini pohoro khapang phaio swrang.
nokha somchaowi phligwi pherang,
kiriya chwng kwnwi himwi bwskang.
salsa kokthai chini sanai thinang,
nwng bai ani hamjakma belaino gwnang.
Khangar yago sunchaoi tamono wansuk?
aswk ba naithogwi hasteni sajwk!
naithok joto nono kwrwngkha,
boroni naithok nwng manbokha?
kanwi kanborok nwngle mwchangkha,
twmano aswk nwngle khakakha?
kubulwi nwngbai borokni hukumo,
nini naithok kokthai salsa bui sawanw;
khapang swrang riowi nwngle chwngo,
hukumo raksao nono manwino.
"Hasteni sajwk" nwngle sajaknai,
nini mukumo khao toroknai.
nini tongmungno haani kok sao,
kanborok chini khano swlago.
swbano naising nwngle tongtikha,
swbano khakai nwngba mithikha?
chini dhopale nono naisaowi,
phunugo chwngno "sajwkma" hwnwi.
nini sinimung belai chwngsa-sa,
hayungo chwngsaowi nwng Tiprasa.
naisingwi wansukgo angle,
khapang swrango bwskang naisikhe.
naithok kwkhrang chini o para,
khapang birsaowi tongthokma bara.
nahar-naharwi angle naibaiya,
salsa saowi kokthaise paiya.
khetoni mai tongkha khwrangsaowi,
bwkha kwchao bono naichomwi.
chini para chini kothoma sao,
tongwi aro matongo amani khurio.
mokol phiyokhe khapang kiyogo,
parani mukumo ano satogo.
aswk mukumo haa bai gwdaljak,
chini naithok para khapangni rangchak.
Jwngjalni o haparo-
mukumo mokolni phataro
khakchangma kwrwikha aro
mokolni moktwi kokthai sahoro.
twima-twisao tini moktwi yoro,
khakhamma chini bangwi phaio.
bo maisingni pantwi mokolo tini?
thapa ganani sikamuk hai bwkha chini.
wansugwi aa kokrok,
tongthok-chathok bai chini nok
joto tabok thangjak kok
kwrwikha chini agini borok
sinimung kwmajak chwng tini
jorale tabok "Songduk" hwnjaknani
bwkha kwrwikha sago chini,
haikheno da chwng tongnani?
Kubui wansukma belaino nango,
ransaowi tongkha chini khao.
khabchaowi wansukthai kwlayo,
jorale chwngno uphilwi klango.
kuchuk sakani bohle taalsa,
wngwi naiyanw angbo salsa.
mukumo ani khao tongnathung,
kolomtwi kibwi hophung-salpung.
togla khorangbai angle sichaya,
jorano bwskang thangna tei rwya.
khasrwango ani thinang naisigwi,
jwngjal koto thangnai usigwi.
Kokno sayaowi-
tonganw naisaowi
mokolbai nono khorang rihorwi.
bwkhabai nono rwktharwi-
tongnai saktharwi,
thanglak angle mwnagwi.
koklob swiyanw nini bagwi-
kok-bokhorok nono yachagwi,
swiyanw nono wansugwi.
muito mankheba kiyokdi motomsaowi-
phainai ang gana kwrang subui,
nini motomno ang rwkthar-rwktharwi.
khapang kebelkha salsa nono nugwi-
khani lam nwngle muthubwi,
khapango ani jala phwnagwi.
mokolbai nono naituk tongterwi-
khapango nini mangpli naiterwi,
biyangba wngkha o naithok bwkhwrwi?
nono naisingwi-
mokolo moktwi,
biyang kwmakha ani mwktwrwi?
swrapsa nukjagwi-
kwmai tongterwi,
khakhamo ani nono lamsogwi.
Mwnakma horo,
khwmakha bo lamao!
uphilwi angle,
manliya tini.
kebelwi phaikha,
ani o bwkha.
birman tini-
sago nangphaikha.
nukhorliya gana-gini,
bo lamao yapri rwnani?
kebelwi khlaikha angle,
kubuino wngkha bui samale.
angle chukliya,
chai awk pungliya.
pohor nukliya,
mokol chukliya.
khapang borsaowi,
sakmang kutulliya.
jora lai thango,
langma paithango.
Jorale maising,
khagwi muimasing;
dibor kwchangsoro-
muphunwi awandro;
chathokma bara,
tongthokma jora.
maisingni kosoi,
thaiglak osoi.
gudok-berema bwtwi,
chanano bwswkse kha-twi.
kwlwksa muilok,
bwswkse morok!
khichonwi athuk,
bwswkse gothok.
phuisaowi mulai-
pukhrio sulai,
awandro-chakhwi-
thokma kulkwrwi.
Mwnakma horo,
khwmakha bo lamao!
uphilwi angle,
manliya tini.
kebelwi phaikha,
ani o bwkha.
birman tini-
sago nangphaikha.
nukhorliya gana-gini,
bo lamao yapri rwnani?
kebelwi khlaikha angle,
kubuino wngkha bui samale.
angle chukliya,
chai awk pungliya.
pohor nukliya,
mokol chukliya.
khapang borsaowi,
sakmang kutulliya.
jora lai thango,
langma paithango.
Tokma kosom kebeng kebeng,
wngna nangkha buini seleng.
Moktwi bai rangchak haa prabwi tongkha.
Yarwng nukjagwi koireng-baireng.
Gairing rekewi mwkhra goron,
kwrwikhwna logi; ayang-oyang aming bolong.
Hathai ni twibuk, haani moktwi.
duwaro sibuk, bisingo borok bwthwi.
Khorang kwplai, khunjo suplai.
bisi broom kwraio borokphang bwlai.
Borok chini khorang manjuwi,
Haano narwknai thansa kolobwi.
Lama hogwi langma swnamnai,
baksa wngkhe hathaibo kuwaknai.
Borok yarwngo moktwi ta yorthu,
takhugo da tei aming bolongno muthu!
Yapri thansa, chwng borok wnglainai baksa.
Kiriya chwngle, borok-bwsa hapungni mwsa.
Chini manthai tei Tipraha ni maya,
Jorale phaikha, Haano karwi tei mungsa nangya.
By: Pyare
