Logi Rwnai De?

pohorni siyari hai kwmai thangtikha,
ani mokolo pantwi kwlangwi.
maisingni bwlai hai nwngle kwmaiowi!

kungkila haikhe nwngle kiphilwi ringhornai de?
ani khao nini motom sarwi!
swrapsani khumbar wngwi jori da thangnai?

khakhamwi khatang tongphoro,
taal pirsai sanjao ano logi rwnai da?
kwchang nokhani mwchang athukiri wngwi.
 
ang khasai tongphoro, twilwlwk emang wngwi phaidi.
saslang jorani twisa hai ani emang kochogo.
rutuk rutugwi nono, mokolo yorphaio.

mwnakni pohor wngwi chwngsai phaidi,
lama bai langmani kwcharo ang kubul tongphoro.
ani khao yarwng surwi, bwrwiphang wngdi.

Nono

Nuktikhe nono,
Bwkha ganao sano.
Yapri yangobo kisa seowi naidi.
Emangno mwkthangkhe mankhamo.

Khakhai khe nono,
O watwi jorao.
Bwlai bai baksa ani mokolno misiowi.
Manna muchungo nini hamjakma mayano.

Kwchang sanjao malaikhe nono
Khumbar kholwi rwkhamo,
Mwchangwi nwng o jadu-
Khakao, o sanja da mwchangwi paino!

Khatangwi nono.
Nini koktwino,
Jora kwtalo angle kubulwi,
Beraio bwkha, nini-ani jorano.

Naisingwi nono,
Emang bai mwkthango,
Nwngba khao mithikyade?
Khao kiphilwi nini-ani kothomano!

AAMA

Kok ni maya khani kakya,
Aama no karwi mungsa sokya..

Thapa ni maidool naising manya..
chaowi saimano amani maya...

Ani Aama,ani Aama khwna ridi kothoma
Maising kwchang, ano bamsa di Aama...

Twisao thwngwi twiko(tuko) rio Aama..
Pokya tabok bo chwraiphru ano kok sama...

Ani Aamani hamjakma kwplai,
Amtwi hamjakma tei boro se mannai???

Maising kwchang AAMA bai thapa gana,
Aama ba tini phantok berem bwtwi se songkhwna..

Ani Aama ni samung yak thakya,
lengo hwnya,kwchango hwnya..
Salbrum ano hamjakna bo paiya..

Khao muchungo saktharwi tongna...
satung~watwi nono yakar bahai tongnai Aama???

Hambai

Kobokdi tei Kwrwngdi

Ani Kothoma

Ani khotoma sabo no sana?
Saichung ang tini,sabo le khwna?

Khwna nai kwrwi ani kokthai,
Kiphil manya ani manthai.

Jora kwbang,sana bo kwbang;
kwrwi bwkrang, birwi manya ang.

ani kothoma bwkhao mwnakjak,
pohor nukya lama kwmajak.

pohja wngkha ani kothoma,
bahai sa-nani bwtang kolokma!

Biyang thang baikha bayab ani?
khwnadi kokthai ani khani.

pirsai rinai ani o kothoma.
mwnak wngkha ani kothoma.

Hambai

Kobokdi tei kwrwngdi

Kebeljak Dopha

dopha ni lama kesep,
borok ni yapri terep.

dopha ni tongthai kwma rw-rwk,
jwngjal dopha tamo manrwk?

biyal dopha kasle jak,
kwrwi kha tongthai rangchak.

gwdalya tongmung chwngno khep kha,
pirjak dopha shakni khuk methep kha.

khorang kesebwi khorang sok liya,
dopha kochokgo,mangsa bo wansukya.

kwrwi shak baksa dophao tini,
kutul baikha khibwi kami.

komorkha bolong,twisa ni holong;
nukhorya toksa buphang bochlong.

raida kwmaoi jwngjal phaikha,
sanai kwrwi "tabok akai kha".

Habmai

kobokdi tei Kwrwngdi

Chini Hukumu

Dophano mwchangwi chini Hukumo,
Pohor bai pirsai rwkha tongthai mwnakno.

Dopha chini athukiri hai kuchuk,
Songduk hwnwi bui tangwiba wansuk!

Dophani bagwi yapri chwng sephru,
Buini yasi chwngno majra bero.

Twrwk twrwk phiya langma chini kubui,
Saktharwi hukumo toninai manjuwi.

Krak hukumo dophani manthai,
Songduk hwnwi tangwi kiphil naikhlai?

Kokthai kwbang kubulwi chini mukumo,
Bono rwktharkhe dophani khorang khwnawano.

Chwngsa-sa chini naithok hukumo,
Jora kubulwi tongnai mukumo.

Hambai

Kobokdi Tei Kwrwngdi

Khapang; tongo wanamang!

Kolomtwi yorwi,sakphaan khibwi;
Jorano nwng swrapna rwngkha de?

Lama hokhlai,poito sokhlai;
sakbaithang nwng himwi naikha de?

Twisa twi yogwi,nokha naisaoi;
Langma kolok naoi naikha de?

Satung sal tangwi,kwrwi maichwlwi;
kokthai kwrwi khe wanama phaikha de?

Wanama Kwbang,sundrujak khapang;
kok thaisano waisni sukrubwi naikha de?

Athukiri pohoro,mwnak-sring horo;
khani khunju bai khorang kwprap khwnaoi naikha de?

Sak mecherwi,logi ke-kwrwi;
Kirima khao doga bukha de?

Watwi jorao,tongthai kebelo;
Wansukmung nono sikirikha de?

Poito kwmaoi,khapang kokthai saphru,
Bwkhani jala sowi naikha de?

Hambai 🙏

kobokdi tei kwrwngdi

Nwngle Kebeljak

Kolomtwi lobsa,
nobar bai walayo phaan khibioi;

kwrwi sak baksa,
bwkhani aari sakno sokomwi;

phaan kwrwijakgo,
bahan khaya samungno tangwi;

saichung sak kaisa,
manthai nini thango kochogwi;

bwkha krak khairokma kwrwi,
khuktwi musui uphilwi thangwi;

kebelwi bayabni hamjakma,
saichung sak kaisa mwchangjagwi;

saichung nwng tini;
tongmung chayano dogar phiyogwi;

tongwi mwnak tongthaio,
khani aaribai nwngle kesebwi;

kwrwi kha sampli,
Mwnak thaio nwng gwdalwi.

Hambai

Comment eba Kwrwngdi

Muito Mano

Muito mano nini kokno,
nwngle ano pogwi de thangno.

khatijak kokrog khao kuplung,
muito mano nono hophung-saphung.

kokthai nini khakchangrio,
muito nini khakhamrio.

Muito mano laijak jora,
logio nini: tongthokma bara.

bwswkse nini khao muito,
saowi sabaya: chanai de poito?

kha kiyogo yak romwi himnani,
khani khachukbai lama himmani.

muito manphiro nini twilwlwk mwkhang,
nini hamjakmao tongo ang kwthang.

jora kiphilwi khao nangphaio,
muito khao, moktwi mokolo.

Hambai

Please Comment and Contact

Nwng

Nwng bai Malaiya ni malaimani,
Jora kwbang;dakti tangwi thangnani?

Ani mwchangjak jora nwng bai se,
Khani kok kwbang bahai sabai nani?

Gana achuk tongrakhudi ang bai,
Ani khani khorang khwna sidi nini kha bai.

Kuchuk ni kormo-motom sampari nwng,
Nono nahar naharwi pailiya ani wansukmung.

Nono kholsai naina bo hoisana kirio,
Nono naisingna khe bo babrai chana kha-sao.

Nwng bai se ani kha le gwdal-jao,
Langma naithok swnamnani ang nono sano.

Swngcharo Kwbang bwrwi,nwng simi ani bagwi;
Salsa ya salsa angle nanai nono kholwi.

Nono ba bui de tlangno kholwi!
Phaio moktwi,thango khani tongthok kochokgwi.

Kokthai tini belai kwbang sana se rwngliya,
Nwng bai malaikhe sana sak-sakno se muito manya.

Sachlang dibor ni kwchang sampli nwng,
Hor ni nokhao kwchwng naithok athukiri nwng.

Sal bai hor bai nwng ano rwthardi,
Ani langma O nwng simi,ano poito khlaidi.

comment and join me

WATWI JORA

Watwi jora pherang grung~grang,
Hayung kisi; nobar kwchang.

Pukhri,twisa,twima,twijlang twi kuplung,
Chumui kosom bai nokha;kwrwi satung.

Nobar sibwi pherang kok khe sundromachao,
Mwnai bwsa kirijakgwi maa ni khurio kao.

Watwi jora joto jani-ja tongthaio,
Mwnai chalai rok tongthokjak mani tuku laio.

Watwi kisi salo selema kul kwrwi,
"bophru thaksi nai?" wansukgo nokhla naharwi.

Nokhla himkhe klaina kirio watwi sek sek,
Kisi nokhla limir wngjak,yakung gwnangwi hapek.

Pherang phlikgo mwnak hor ni watwi o.
Amtwi jora kirimani khunju kholop laio.

Watwi jora tokma kisi shaktwi karo,
Buphang ni kungkila kha-swrangwi kuhu~kuhu pungo,

Joro joro watwi o mwktrwi thangma siya,
saichung achuk tongkhe wansukmung paya.

Kaham-hamya bai hayungo watwi jora,
hayung tukuma jora,naithokma bara.

comment or join me